قصيدة
بتتجوز من قبل ما تنتهى العدة



رميح الحصان
بيبتدى بخطوة
فى المرماح
و لا كان جرى خطوة
اقولك المرماح
ما يحتاج
غير حتة فضا
اما الخيال موجود
ده مولود
فى بلادنا
كيل الطحين
بيكفى
كام رصة
اصل العجين
ليه
ميت قصة
فيه ناس بتقرش
ع الفاضى
مهما زوقت
الحتيت
و لا بترضى
والغريق بيتعلق
بالقشة
زغاب اليمام
لا بتسكت و لا بتهدا
شيل الزكيبة
فن
زى المشى
فى السكة
هات لى غراب
حاعمل
عمل العجايب
حاعمل زيه
و سط الموالد
ان كنت مع الغنم
التعلب
عمره ما بيرعى
لبس الطواقى
مش محتاج
قواد
بس محتاج زكة
فيه ناس
بدل ماتربى
كلب
تقوم مربية
بسة
البنت زى
امها
تطبخ زيها
قالوا
فى الامثال
اقلب القلة
ع فمها
فيه عندنا
ناس بتخبز
بالردة
غدينى او عشينى
غير الظفر
ما تتملى عينى
ما محلا
العيش بالدقة
والمحقان بالبيض
دوا كله وفا
ده الشلول
عمره
ماكان بالتوم
اما البصل
حكاية
ملهاش آخر
يابخت اللى
انزوى برغيف
و الطبق مليان
ده العسل مالى
الجرة
ياصياد شباكك
مليانه اسماك
و الورن بيتكرع
قدام الباب
اللى يصيد
القمرى
يبات ندمان
و يشتكى حظه
و اللى معاه
الزهر
مايرضى
الا بمد الغلة
اللى تتجوز
العفش
يجيب لها
ميت ضرة
النيرخ
فى الطياب
عامل عمايله
والود ده زين
فى السيجة
المليح
لابد انه اتعلم
منه
درب الغوازى
مشهور
ف الحتة
اصل الدنيا
ده ربكة
مخليه الذكى
مع الجحش
ف نفس القصعة
ممكن تلقى
ناس بتتجوز
من قبل
ما تنتهى العدة
يا عذاب
اللى اتجوز
واحدة كدا
ماتستوى المرأة
بالعبدة
والمر مابيحلا
زى ماالترمس
خبط ع البيبان
عجبان
و زى المية
ماجرت
فى الغيطان
ماتسكت
على الفعل
الشين
المرَة الحرة
محمود العياط
من ديوان على الزراعية يارب اقابل حبيبى